Hegan

Hegan, 2020ko otsailaren 23an

Urte bat da Labarretan ginela.

Konplizitateak eraman gaitu,

desioak erantzitako soinekoak logelako lurrean,

eternal nahi genituzkeen besarkadetan urtzera.

Eguzkiaren lehen printzak sartzen dira leihoko zirrikituetatik 

gozamenak marraztutako irribarre lasaiak argituz.

Muxu leunez eskaintzen diogu elkarri 

une honek merezi duen esker on guztia.

Gorputz biluzien lotsagabetasuna laztantzen dizudan artean, 

zure besoetan denboraren joana desafiatzea dut maite, 

gauak

orduak agortzen dituen egunetan.

Aldiro,

gure sekretuak partekatzen ditugu,

hurbiltasunaren babesak ematen duen segurtasunetik.

Maitasun hitzak trukatzen ditugu,

elkarrekin igarotako une bakoitzean

gehiago larrugorrituz.

Elkarri maite ginela aitortu genionean,

amildegiak atzean utzi eta

 sentimentu osoz aireratu ginen.

Gaur ere,

begiak begietan,

irri egin eta

zeinen pozik zauden aitortu didazu. 

Aireratu naiz.

Hedatu zait irria,

poztu bihotza,

lasaitu burua, 

gozotu ahotsa

eta… gaurkoan bai,

nire barren-barrenetik atera ditut

zuretzat gordeak nituen

hitz gozo guztiak.

. Kontuke